أكثر شي بجاكرني، لما بلقطوني المخابرات، هو أنو ما بيسألوني عَنِك
بيسألوني عن كل إلي بعرفن والي ما بعرفن إلا إنتِ
بيسألوا عن أهلي ورفقاتي وأصحابي، وزملاء وزميلات العمل (مع إني بطّال لا تواخذوني)
وأمي وأخواتي الشباب والبنات
عن جارنا الي مات
وجارتنا المطلقة
عن البنت الي كنت حبا أيام المدرسة
بس عنك ما بيسألوني
وقديش بحاول أدحش اسمك دحش بكل شي
يعني إذا سألوني وين سهرت مبارح (مع إني ما بكون سهران)
بقلن سهرت معك بالحمرا
وإذا سألوني عن أخي الي أنضم للجيش الحر
بتبرى منه وبقلنّ أنتِ عيلتي وكل ناسي
ومع هيك ما بيسألوني عنك
ولما شبحوني مشان اعترف ع جوز أختي إلي طلع أخوان
اعترفت عليه وعليكي...
وأخدوا اختي واولادا (لأنو المؤص هربان) وما أخدوكي
وكل مابيضربوني بصير بنادي اسمك بيزيدوا الضرب
بس كمان ما بيسألوني عنك
ليكي أنا بلشت شك فيكي ليكون بتشتغلي معن وأنا متل الأجدب مو عرفان
ع كل حال وشو ما صار بحبك غصب عن الكل، وغصب عنك كمان
وبدي ضلي أحمل اسمك لأخر العمر ولبعد العمر